TVB視帝收埋囝囝，兩公婆一齊去過二人世界

前港姐陳凱琳（Grace）前年嫁畀TVB視帝鄭嘉穎，今年2月份陳凱琳榮升做媽咪，囝囝鄭承悅而家4個月大，一家三口溫馨美滿。

前日係陳凱琳嘅28歲生日，之前佢就透露正日會同老公鄭嘉穎、囝囝悅悅，一家三口去旅行慶祝，呢日佢就喺社交平台大曬旅行片段，不過就好攪笑咁「埋怨」，囝囝阻住佢哋兩公婆過二人世界，留言：「我諗住生日可以過二人世界，但係悅悅實在太恐怖，點都擺脫唔到佢。」

咁都未夠，佢哋仲發揮「戲精」本色，拍片做動作要將囝囝放到酲缸里面，實行想計「擺脫」佢，片中鄭嘉穎負責「落手」，陳凱琳就喺隔籬「睇水」兼向途人示意唔好出聲。

至於悅悅全程勁淡定，好似已經習慣曬父母嘅誇張舉動，場面好攪笑。

唔少圈中好友，包括湯洛雯、朱千雪同陳嘉寶等人，都留言大贊悅悅得意。

另一邊，陳凱琳嘅「少婦聯盟」好姊妹龔嘉欣同譚凱琪，亦都喺陳凱琳出發旅行前率先同佢慶祝。

龔嘉欣喺社交平台曬咗幾張生日合照，并留言送上祝福：「多謝緣份將我哋連喺一齊，祝我哋最靚最甜嘅陳凱琳生日快樂，繼續幸福滿滿，We love you」。