樂瞳曾經出過噴血寫真，更被網民封為「TVB咪神」，呢排咪神搖身一變做老板，喺疫市創業賣洋酒，而且樂瞳仲瞓身去到盡，將咭片掟上網，講明親自接單吸客。
開業第二周，樂瞳仲親自送貨，呢條橋簡直吸引一班醉翁之意不在酒嘅粉絲，而且清一色係麻甩仔，買酒見偶像，好過畀折頭優惠。
樂瞳送貨當日，記者跟隨直擊，佢坦言小本經營暫時租朋友葵涌工廈嘅寫字樓做貨倉，地方不便入鏡，唯有喺工廈樓下等佢出發送貨。
慳得就慳，樂瞳更搵嚟前DJ林柏浠仗義幫手做司機，拉著有兩箱酒嘅手推車，樂瞳話：「好開心，好緊張。唔知佢哋見我有乜反應，可能好冷淡，哈哈！」
話口未完，樂瞳遠處已經見到麻甩仔客人，客人仲化身「送水輝」一手接貨，一手向樂瞳遞準備好嘅雪藏飲料：「飲啖水先！」，跟手向男客人話：「試咗支酒，啱飲嘅話記得再幫襯。」
咪睇樂瞳嗲嫡嫡，其實幾捱得，當年佢喺TVB拍劇，要吞幾籠擺咗超過一星期嘅過期道具饅頭，都可以頂硬上。而家創業小本經營要一腳踢，辛苦程度唔比捱更抵夜嘅幕前工作少。
唔理點樣，都係希望樂瞳喺之後嘅事業上可以有所成就，期待佢嘅表演！
Like MisshkNews Facebook！不出门也能知天下事～
