現年40歲前TVB小花李焯寧，呢排忙住為內地超級網劇開工，不嬲被譽為「TVB御用丫鬟」嘅李焯寧，今次喺新劇中轉型飾演大家姐角色，全程霸氣上陣之余，仲與一眾男神包括黃宗澤、吳卓羲、關智斌等人合作。
受訪嘅時候，李焯寧透露自己現時積極減磅中，要戒糖同澱粉質，希望可以以最佳嘅狀態示人，佢又大贊劇組好貼心，為佢安排特別健康餐單，李焯寧笑言：「佢哋會喺我飯盒上面寫明『李焯寧，勿動』字眼，真系好感激佢哋咁細心。」
2013年離巢發展嘅李焯寧，多年嚟好少喺無線劇集亮相，對上一次獲邀返巢參演人氣劇集《使徒行者2》，喺劇中飾演梁斯敏嘅佢，未知各位粉絲有無印象呢？
傾到最近工作安排，李焯寧表示除咗拍攝內地網劇之外，同時仲接拍咗Viu TV嘅時裝劇集、內地嘅古裝劇，劇接劇嘅佢指即將要同時為三套劇集開工拍攝，笑言自己忙到有啲精神分裂！
佢話：「好在三套劇嘅角色都好唔同，Viu TV嗰套飾演辦公室嘅打工仔，而古裝劇就系飾演娘娘。」
另外，李焯寧又透露等到手上嘅劇集拍完之後，計劃將會喺八月份出埠去日本旅游兼還神。佢話：「我上年去咗東京一個地方去參拜，講當地好多知名藝人都會去，話可以有助演藝運，今年真系劇接劇，所以諗住去還神。」
1979年出世嘅李焯寧，佢入行到而家已經19年時間，佢早喺2000年參加第14期無線藝員訓練班入行，主力拍劇嘅佢，曾經先後喺多部無線劇集中亮相，比如《公主嫁到》、《布衣神相》以及《談談情練練武》等。
由于佢經常喺古裝劇集中飾演丫鬟嘅角色，所以形象好深入民心，更加獲封為「TVB御用丫鬟」之稱。
近年，李焯寧以自由身繼續活躍喺娛樂圈拍戲，除咗繼續接拍唔同平臺嘅電視劇之外，同時亦都涉足電影圈，期待李焯寧帶嚟更多新作！
Like MisshkNews Facebook！不出门也能知天下事～
