轉眼間，又一年嘅港姐競選要開始啦，2018年港姐季軍丁子田喺今日就出席咗《2019香港小姐競選》嘅記者招待會，同場嘅仲有同屆港姐冠亞軍陳曉華、鄧卓殷以及港姐師姐陳凱琳、劉穎鏇等。
一眾港姐出場瞬間成為全場亮點，而港姐們都為新一屆嘅《香港小姐競選》進行招募活動，傾到跟住落嚟就卸任港姐，一眾應屆港姐表示唔捨得，仲話要每一年都要拍一張合照，好好紀念。 
而應屆港姐季軍丁子田講到卸任港姐宣言就表示：「心情覺得好緊張，因為唔知道下一步會系點，但又覺得自己成長咗大個咗好多，亦好期待呢屆香港小姐質素會系點。」
不過，因為丁子田喺當選港姐後活動唔多，都臨近卸任，就有報道指其將唔會再續約TVB而另謀出路。對此佢就澄清表示：「其實冇咁嘅事，可能最近我比較低調，所以大家覺得我系，其實唔系，所以而家我覺得要準備下自己，睇下一步會點行，都等公司安排，睇下有咩啱我。」
談及當選港姐後呢一年嘅感受，丁子田都有過迷茫時期，亦都曾經諗過放棄，不過好彩最後對于前進嘅方向都終于諗通咗，都因此而作出改變。 
佢話：「自己本身性格好怕醜，又比較沉默，當初參選港姐都系想鍛練自己唔好咁怕醜，當選之後，見到其他佳麗工作演出機會比較多，明白到自己中文講得唔好，系一大阻滯，變咗會少咗好多工作嘅機會，其實都會有啲失落。
但自己經過反思之後，覺得而家出道先一年時間，所以我而家除咗不斷苦練學習講廣東話之外，性格方面都要改變一下，唔好咁怕醜，期望可以好似香香（岑麗香）演出咁成功。」
其實丁子田今年先25歲，仲有好長嘅路要行，希望佢可以突破自己嘅心理障礙，能夠好好咁表現自己，相信佢一定會畀我哋帶嚟一個令人刮目相看嘅變化，期待佢嘅好作品！ 
Like MisshkNews Facebook！不出门也能知天下事～
