前港姐頻頻做第三者，而家畀「少年食神」暗嗒

擁有34D驕人身材畀封為新一代「TVB咪神」嘅張秀文，張秀文喺2010年參加香港小姐競選，因為同王祖賢相似所以成為當年冠軍熱門，可惜最後成為咗亞軍。

選美結束冇幾耐張秀文就簽約TVB，不過演出機會少，當年佢啱啱入行嗰陣存款唔夠一千，連演出衣服都要問人借。

捱窮捱夠嘅張秀文，畀爆出同足球名宿亞洲鋼門仇志強之子、前經理人仇耀斌拍拖之後，就一直表現恩愛，兩個人更被發現喺將軍澳一齊同居。

不過舊年三月份，張秀文突然畀拍到同花心王子尹子維甜蜜蜜幽會，疑似介入對方與大陸女星徐冬冬嘅戀情，陷入四角戀。

事後，張秀文突然宣佈同仇耀斌分手，為咗做上等人佢只好砍斷七年情根。

恢復單身之後，張秀文自此緋聞不斷，佢唔單止畀指介入張景淳同呂慧儀之間，仲盛傳拍新劇嗰陣，佢主動去姣擒羅仲謙。

另外張秀文仲唔滿足，仲頻頻出擊獵筍盤。據悉，半年前有「少年食神」稱號嘅林澄光，藉住搵張秀文合拍飲食節目，乘機追求。

據悉，林澄光帶張秀文食飯，專去自己有股份嘅餐廳，一路食飯一路炫耀自己身家。林澄光畢業之後就接手老竇嘅工程公司，所以身家不菲，而佢亦曾經自稱擁有過百部古董車，并有唔少靚車牌。

有傳十幾年前，林澄光為咗追求性感女星梁敏儀，不惜送上心愛嘅幸運車牌冧女方，不過最終追女失敗，而兩個月之後，佢竟然向女方攞返車牌，事後梁敏儀也直認畀收返車牌一事。

林澄光亦做過日本車代理，而對巨咪女星情有獨鍾嘅佢，當年就靠借車畀女星影相，跟住借勢食飯并加以追求。

日前，熱戀中嘅張秀文、林澄光，難忍相思之苦，冒住染上新冠狀肺炎嘅危險，相約出街食飯，而為保啱萌芽嘅愛苗，更專登揾嚟電燈膽。