呢排，陳法蓉受訪時主動澄清，同蔡少芬老公張晉嘅不和傳聞，強調與張晉一向關係好，而有網民就重提往事，指出與陳法蓉真正不和嘅人，係1989年港姐季軍梁佩瑚。
梁佩瑚由於媽媽早年病逝，爸爸再婚，背負起照顧3個弟妹嘅責任，到咗19歲參選1989年香港小姐競選獲得季軍好成績，同年再代表香港參加世界大學小姐競選得到「魅力小姐大獎」，之後加入TVB。
啱啱出道，梁佩瑚就畀力捧演出重要劇集，如《同居三人組》程安佩一角，4年之後就向影壇發展。
不過梁佩瑚接受傳媒專訪時，自認心直口快容易得罪人，試過有次趕時間出席公司飯局，畀導演嘲諷：「快啲去接客。」嬲到投訴對方，之後梁佩瑚自覺唔擅長埋堆，所以開始淡出幕前。
2001年，梁佩瑚轉型做才女，到而家已經出版超過五十幾本愛情小說，有部分成為影視作品，當時亦有擔任「慧妍雅集」嘅會長。
梁佩瑚雖然事業得意，不過佢原來曾經遇人不淑，透露自己經歷過三次悔婚，最嚴重係畀人掠水，甚至畀人欺騙做第三者。
後尾梁佩瑚單身多年，接受傳媒訪問話：「我唔係睇小自己，係睇小香港啲男人，可能我唔好彩，未遇到好男人，我寧愿孤獨終老，都唔屈就自己。」
好彩，因為一場哥爾夫球，遇到比佢細一年嘅蒙古地產商人，儘管對方失婚仲有一個仔，但梁佩瑚唔介意，所以兩個人喺2016年拉埋天窗。
而家梁佩瑚同老公生活幸福快樂，將16歲繼子視如己出，佢呼吁未嫁得出嘅中女：「各位單身姊妹，緣嚟到唔使專登打扮嘅，係中嘅就中，大家要畀心機，唔好放棄。」
Like MisshkNews Facebook！不出门也能知天下事～
