前港姐退出娛樂圈做OL，自曝年紀唔細恨結婚

現年45歲嘅向海嵐（Anne）係1998年「四料港姐」，當時向海嵐榮獲「香港小姐冠軍」、「最上鏡小姐」、「環球美態大獎」同「動感都會大使」四個大獎，而佢更坦言曾經因為各種嘅名銜而失去自我。

《香港小姐競選》一直標榜「美麗與智慧并重」，兩者缺一不可。對好多女仔嚟講，參選港姐係兒時夢想，又或者係實現夢想嘅途徑之一。

「四料港姐」向海嵐喺外界睇嚟可能好風光，名利雙收，但佢卻坦言正正因為呢個名銜，佢曾經失去自我：「一出嚟見人就要坐到好直，好斯文噉樣坐好，講嘢都要大方得體。」

向海嵐喺退出娛樂圈7年之後，于2015年喺大陸復出，先後參演過大陸電視劇，主持過清談節目、做過舞臺劇。

TVB都曾經搵向海嵐回巢拍劇：「其實都有搵過我，但係時間上真係對唔上，之前有幾套真係撞咗其他期，所以冇辦法，唯有睇下再有冇機會啦。」

向海嵐入行後喺TVB飾演《楊貴妃》、《無頭東宮》等古裝劇，畀一致公認氣質高貴，因此海嵐有「古典美人」之稱，佢係千禧年代備受力捧嘅花旦之一。

喺2008年向海嵐面臨演藝事業嘅瓶頸，唔知點向前行，啱啱嗰陣時上海嘅一間公關公司向佢發出邀約，於是佢毅然選擇告別娛樂圈，拋下一切去上海過起朝九晚五嘅OL生活。

遠赴上海工作嘅決定，令向海嵐覺得有明顯轉變：「以前同我做訪問一定唔得，真係有一句講一句，跟住就唔知講乜。可能我讀完書就選港姐，當年港姐拍劇其實好受保護，好多嘢都有人處理，總之準時工作做好有工作就得，喺好受保護嘅環境下，好難學識獨立。」

對于婚姻，向海嵐直言曾經急過覺得自己年齡唔細要嫁人，但現階段佢係適應慣：「都會想結婚，而家同屋企人一齊住，基本上做乜都會同父母交待。」

最后，missHk都祝福向海嵐可以早日揾到自己理想嘅另一半，加油。