前港姐畀爆「公器私用」，暗撻大隻仔三個月

舊年12月30日，前港姐馮盈盈（Crystal）突然含淚自爆同拍拖四年嘅同居醫生男友Martin鐘文浩（昵稱寶寶）分手，結束四年情，見到記者嗰陣講「相處易同住難」。

呢排就有消息指馮盈盈公布分手嗰陣，同一時間原來已經同「大隻仔」鄭衍峰（Leonard）「起暗涌」，更有指佢哋原來已經暗撻三個月！

本月，馮盈盈喺自己主持嘅節目《＃後后生仔傾吓偈》，安排八位小鮮肉大搞「盈盈嘅單身派對」，當中就有指佢親自點名請鄭衍峰做其中一位猛男，疑似「公器私用」。

節目中二人有多次身體接觸，好似公主抱、托美腿、隔口罩喂蝦條等，借“鏡頭需要”公然Sweet Sweet，馮盈盈又即場漏口風指，鄭衍峰知道佢鐘意周星馳，將電影對白重新包裝成為節目中嘅示愛內容！

事後，馮盈盈回應：「我同佢係好朋友，其實我會結識新朋友，同朋友出街食飯都好正常，對于我感情狀況，我亦抱開放態度，好多多謝大家咁關心我，希望大家可以都畀我空間！」

而鄭衍峰就話：「嗰日其實係一班人BBQ，我同佢係朋友，朋友都要時間識嘅，而家慢慢識，就算我想，佢都大把選擇，只可以話多謝大家覺得我襯得起佢！」

講到「大隻仔」鄭衍峰，其實佢現年28歲，佢從細喺加拿大溫哥華成長，2013年畢業于英屬哥倫比亞大學，2016年簽約TVB回流香港發展，馬上加入娛樂新聞臺擔任主播。

除咗高學歷之外，鄭衍峰身材都幾有料，有43吋胸肌同六塊腹肌，直至2017年同鄺潔楹主持節目《3日2夜》，因為大露肌肉而引起網友關注。

鄭衍峰仲自爆節目出街之後，深得男粉絲歡喜，社交平臺有7成都係男粉絲，佢亦坦言對男、女粉絲都一樣歡迎。