日前，前港姐劉思希就忙住為TVB處境劇《愛回家之開心速遞》拍攝，除咗拍戲外，佢都要兼顧喺香港科技大學修讀嘅行政工商管理碩士（EMBA）課程，不過呢排佢就去到德國修讀短期課期。
佢話：「今次去德國我係上品牌管理與及歐洲經濟及營商環境呢兩科，除咗有教授講課，課程仲請咗名牌高層嚟同我哋上堂，讓我哋知道佢哋點維護呢個超級品牌。」
不過勞逸結合，劉思希喺每日應對功課嘅同時，喺落堂之後自然都要好好欣賞當地嘅風景，體驗一下異國風情，感受當地風俗文化。講到德國出名梗係啤酒啦，佢話：「德國啤酒好出名，喺德國幾日，日日飲啤酒同食咸豬腳。」
而劉思希都透露自己有意與同學一齊創業，佢話：「會同同學搞美容或者科技生意。（儲夠錢開業？）我平時都好慳，都夠錢嘅，希望今年可以成事。」
雖說事業順利，但係劉思希就直言自己喺感情方便就好失敗，就連喺讀行政工商管理碩士課程以為可以喜獲良緣，最終卻同大家玩到咗一齊，成為咗兄弟，用佢嘅話嚟講就係「只怪自己太男仔頭」。
1985年出世嘅劉思希，曾經參加過香港小姐競選，因為長相好似前無線電視女藝員廖安麗而獲傳媒稱為「後生版廖安麗」，最後可惜落選港姐，但佢喺選美結束之後就進入到TVB，開始發展其演藝事業。
期間，佢曾經參與拍攝過多部電視劇集，比如《拍拖季節》、《巨輪》、《忠奸人》、《迷》、《愛回家之開心速遞》、《逆緣》等。
據悉，喺跟住落嚟嘅新劇《丫鬟大聯盟》、《黃金有罪》中劉思希同樣有份演出，唔知呢位「學霸港姐」又會畀我哋帶嚟點精彩噶演出呢？大家不妨一齊拭目以待！
Like MisshkNews Facebook！不出门也能知天下事～
