前度高調宣佈結婚，「TVB小生」大方祝福舊愛婚姻美滿

「TVB小生」鄭俊弘尋晚拍攝《流行經典50年》，佢傾到舊歷新年同未婚妻何雁詩屋企人去泰國度假，何雁詩喺當地用咗一萬蚊買10個口罩，笑指未婚妻真係好搏命，但主要係幫朋友同雙方屋企人購買。

問到係咪太貴好心痛？鄭俊弘坦言冇辦法，因為健康最緊要，錢冇咗可以再搵過，而佢都會將口罩送畀家姐做新年禮物。

問到今次泰國之行會唔會兩個人去三個人返？佢笑稱都冇時間，因為第二日朝早需要體力做運動，過多幾年先啦，而家要努力做嘢。

鄭俊弘傾到舊愛姜麗文日前喺社交平臺高調報喜，同工程師男友結婚，佢直言：「姜麗文之前都有同我講過，我非常替佢開心，祝佢哋婚姻美滿。」

問到《踩過界2》連續兩日停拍，鄭俊弘話自己嘅工作暫未受影響，《流行經典50年》繼續開工，月中開拍《陀槍師姐2020》，暫時冇收到延拍通知。