前「TVB小生」確診新冠肺炎，住院11日康復出院

前「TVB小生」劉少君較早時（7月20號）確診新冠肺炎，住院11日康復出院，尋日佢更通過短視頻向大家報喜，佢已經完全康復出院。

劉少君表示：「我啱啱喺伊利沙伯醫院出嚟，因為由於醫院嗰邊比較緊張，所以冇叫傳媒過嚟，而家暫時去咗尖沙嘴某間酒店自己休養下先，大致上慢慢恢復好精神。」

劉少君仲話：「呢次真係好多謝、好多謝香港醫護界所有嘅醫務人員，佢哋咁細心照顧啲病人，甚至乎一個小工，佢哋每清潔一次地方都消毒得好細致，我真係好欽佩。」

現年59歲嘅劉少君係TVB第8期藝員訓練班學員，佢同湯鎮業、廖啟智、景黛音、周秀蘭等人係同學，曾經參與拍攝《真情》、《笑傲江湖》、《鑒證實錄》《陀槍師姐II》等。