呢排有消息指前「星夢一姐」吳若希再陀B，兼夾成功追到仔湊成好字，但唔知係咪因為陀B唔夠三個月避免BB小氣，吳若希選擇封口唔認，甚至老公何兆鴻日前出席活動，都拒絕受訪。
不過尋晚吳若希終于喺社交平臺正式宣佈喜訊，佢曬出一張一家三口望住個肚嘅相，身穿白色連身裙嘅吳若希孕味極濃，囡囡摸著佢個肚，仲留言話：「一家四口。」 
雖然吳若希冇公布BB嘅性別，但老公Alex已經公布二胎係個仔，佢喺社交平台曬出老婆同囡囡合照，仲留言話：「淼淼要快d努力學識點樣做一個好家姐。」
其實喺吳若希28歲生日當日佢曾經表示同老公嗌交，佢仲點名話：「何兆鴻令我體會到一件嘢，無所謂嘅應唔應份，只係睇你樂唔樂意。你唔樂意，就冇嘢係應份。」
之後有網民勸吳若希家醜唔好出外傳，佢回復話：「點解醜？邊到覺得係家醜？」亦有網民直問佢係咪大肚，佢繼續扮神秘：「遲啲話畀你聽。」
Like MisshkNews Facebook！不出门也能知天下事～
