TVB決定咗呢個月17日播出由「TVB小花」黃翠如、森美主演嘅劇集《過街英雄》，其實劇集一早喺倉底塵封咗足足兩年，之前曾經有機會出街，但最後就畀抽起改播《丫鬟大聯盟》。
當時《過街英雄》僅獲安排喺海外出街，黃翠如喺劇中最初係一個鐘意以武力解決問題嘅便衣警察，不過《過街英雄》并非一般嘅警匪劇集，而係TVB少有嘅超級英雄故事。
《過街英雄》講到森美飾演嘅記者星仔，因為一次交通意外唔見咗左耳，喺美國專家嘅幫助下，移植咗喺白老鼠身上培植嘅耳仔，而老鼠嘅基因亦同時令佢成為老鼠俠。
森美擁有超人身手、聽力同嗅覺，能力愈大就責任愈大，但星仔本身剩格又縮骨，所以攪出唔少笑話。
其實《過街英雄》唔單止係因為故事輕松、生鬼，好啱喺疫情下嘅暑假檔期播放，讓大家可以暫時拋開壓力，更加係因為擔正演出嘅森美不嬲形象風趣、正面，深受主婦同小朋友歡迎。
劇集中仲有黃翠如誘惑上司嘅戲份，黃翠如化身成俏秘書，全程對上司施以嗲功，仲展示驕人身材，配上恤衫短裙，喺對方面前搔首弄姿，又大騷靚美腿，睇得對方心思思。
Like MisshkNews Facebook！不出门也能知天下事～
