鐘欣潼（阿嬌）喺2018年5月閃嫁臺灣「醫界王陽明」賴弘國，點知道婚姻只維持得短短14個月，據悉佢哋已經喺3月1日離婚，消息一出震驚兩岸三地。
據知情人士透露，離婚係由阿嬌提出，而且早喺佢哋結婚之後冇幾耐，佢就提起過一次，因為覺得大家識咗兩個月就結婚，相當草率。
嗰陣時賴弘國試圖挽回，喺阿嬌拍戲嗰陣成日飛去劇組陪佢，感情一度有升溫，點知道今年2月幾，賴弘國再度飛到去國外探阿嬌嘅班，先啱啱返臺灣就接到阿嬌再度提出離婚。
事後傳媒致電求證賴弘國，佢承認今年3月1日已經同阿嬌離婚，當記者進一步求證兩個人離婚原因嘅時候，賴弘國用4個字嚟回應：「佢唔愛我！」
賴弘國都坦承2018年5月美國婚禮之後，阿嬌就后悔呢段婚姻，但當時兩公婆有簽約一啲真人騷節目，為咗呢啲合約，惟有繼續維持假面婚姻。
記者更致電阿嬌，但英皇娛樂代回應：「佢哋雙方已經簽咗分居協議，希望可以畀雙方有一個冷靜期，唔想多講，以後關於婚姻嘅問題，都唔會再回應，多謝各位關心。」
而且香港法律規定，夫妻一定要分居達一定時間先可以正式離婚，因為雙方結婚前就已經簽訂財產獨立協議，所以離婚唔涉及分產問題。
唔理點樣，婚姻始終都係當事人先清楚，勉強維持只會讓雙方都辛苦，都希望大家可以多畀佢哋空間啦！
Like MisshkNews Facebook！不出门也能知天下事～
