「TVB視帝」戲外戴綠帽，戲內萬人迷

「TVB視帝」馬國明經歷咗「安心偷食」單嘢，無奈畀網友封為「綠帽明」，日前佢終于恢復元氣，攞落視帝之後再下一城，由佢主演嘅《降魔的2.0》終于緊接《機場特警》喺5月出街。

三年前由馬國明、黃智雯、胡鴻鈞、劉佩玥主演嘅《降魔的》掀起追劇潮，只要主題曲《到此一游》一響起，由3歲到80歲都識得唱，一度成為洗腦神曲。

馬國明作為《降魔的2.0》男主角，佢仲溫馨提示大家重溫第一輯先好收看第二輯，因為上一輯留低唔少伏線，而《降魔的2.0》會一一拆解。

承接上一輯，的士司機馬季（馬國明飾）繼承精靈石敢當嘅天命，走上降魔之路，更同好友莫偉豪（胡鴻鈞飾）靈魂重逢，上一輯情同兄弟，但呢次胡鴻鈞同馬國明會變成死敵，劇情真係奇幻又緊張。

馬國明友情受到考驗，卻艷福無邊，馬國明除咗繼續迷戀黃智雯，上一輯死嘅劉佩玥以鬼魂現身繼續癡戀馬國明，并加插譚凱琪介入馬國明同黃智雯當中，情陷四角戀，認真值得期待。

連馬國明直言：「從來冇試過咁有女人緣，原來做的士司机都有咁多女仔鐘意，我將來唔做戲可以轉行揸的士。」

除咗係原班人馬拍攝《降魔的2.0》令人期待，有一個新人大家都可以留意，佢就係前華姐冠軍鄧佩儀。

戲份好重嘅鄧佩儀，佢造型上相當出位，一降魔就變身以超短裙大騷長腿，加埋唔少特技同動作場面，似足萬綺雯喺《我和僵尸有個約會》嘅馬小玲，睇嚟TVB專登塑造佢成新一代馬小玲。

唔理點樣，《降魔的2.0》好快就會同大家見面，大家千祈唔好錯過。