「TVB花旦」新劇飾演女強人，單身7年再闖情關更懂愛

TVB新劇《多功能老婆》尋晚首播，「TVB花旦」陳煒喺劇中飾演女強人萬風華，劇中角色無論個性或者外表都好強勢，靠攀附一啲關係而上位。

不過喺戲外，唔好睇陳煒外表硬掙，其實個性溫柔講嘢陰聲細氣，同劇中飾演角色完全唔一樣。

呢排陳煒接受傳媒專訪，講到自己同角色相差好大，性格唔夠進取，坦言喺娛樂圈生存好蝕底：「我冇乜機心同脾氣，好懶洋洋。由選美入行，所有嘢都由公司去安排，一部劇拍完就接下一部，我唔需要去爭取乜。」

喺2012年，經歷婚變嘅陳煒用咗一段長時間先至可以面對，縱然情路上曾經遇到挫折，佢仲係相信愛情，并指人與人相愛係一種化學作用。

以《多功能老婆》嚟做比喻，即管你有幾全能又好，如果另一半唔肯去開啟呢團火，都係徒然，因為大家冇接通，所以雙方肯付出去維繫一段感情先可以長久。

陳煒喺今年7月畀拍到陪醫生男友陳國強出埠工作，戀情曝光，現階段兩個人感情穩定：「大家都好成熟又有自己事業，要互相去平衡，最緊要係去溝通，佢嘅工作時間相對穩定，好多時候由佢就我。」

講到男友嘅吸引之處，陳煒覺得另一半嘅關懷好重要，而男友正正就做得到呢一點：“心入面有我嘅存在已經可以，無時無刻都將我列入計劃之內。唔一定要以我為先，總之係考慮之列。”

唔理點樣，宜家見到陳煒同醫生男友咁幸福，真係替佢哋開心，祝福你哋永遠幸福快樂喔。