「TVB秘書王」曾經流產險死，因為一事即飛前度李思捷？

入行17年，葉凱茵有「TVB御用秘書」之稱，雖然飾演配角為主，不過網民都贊賞佢演技夠自然，最令觀眾印象深刻就係《愛回家之開心速遞》嘅Mollie。

唔講唔知道，其實葉凱茵曾經經歷過喪子之痛，一度患上驚恐症、中風，好彩最後靠意志力同屋企人嘅支持撐落去，而家成功翻身做美容生意大老細！

葉凱茵未入行前做過秘書，2002年參加香港小姐競選入行，同屆冠軍為林敏俐。

早年，葉凱茵與李思捷因為拍劇而撻著，但有傳因為花心同大男人性格，令葉凱茵提出分手。

直至2009年，葉凱茵與圈外眼鏡商人郭家梁閃婚，誕下大仔，成為人母。喺2015年，葉凱茵再度大肚，政府、私家醫院都有檢查，本來一切順利，但懷孕9個月時患上突發性妊娠毒血症。

早年葉凱茵接受傳媒訪問時舊事重提，希望大家知道疾病嘅嚴重性，據知當時佢以為腹痛係作動要生，送院時仲好清醒，點知道被告知胎死腹中，即時又驚又亂，血壓升到為180，有中風可能性，命懸一線。

經過幾個月治療，葉凱茵喺屋企休養幾個月，終于慢慢復原。面對BB夭折之痛，葉凱茵初時情緒不穩，經常喊咗出嚟，一度懷疑自己有驚恐症，好彩有大仔支持、老公又有悉心照顧，先冇精神崩潰。

大難不死後，而家佢卒之可以積極面對人生，葉凱茵同朋友合資6位數做生意，開設網店售賣美容產品，希望個仔將來過得舒服。

她表示自己主要負責宣傳，拍檔負責入貨，產品會試過先賣，面膜都試咗十幾、二十種，效果唔好就唔會入貨，目標係開多一間鋪專賣潮物。