「TVB小生」自爆拍戲愛上張曼玉，無法抽離角色…

「TVB小生」關禮杰當年執二攤飾演《新紮師兄》中嘅角色好姐，劇情主要講述好姐鐘意張曼玉飾演嘅謝穎芝，由於佢同張曼玉有唔少對手戲，一度無法抽離角色掛住對方。

關禮杰話當時正同現任太太拍拖，有時都會好掛住張曼玉，但拍完戲之後就專業噉抽身，方法就係靠做運動。

關禮杰坦言喺大陸拍戲會遇到狂蜂浪蝶，關禮杰話∶「我拒絕對方，同時會叫太太嚟。女仔好敏感，有乜風吹草動，一眼就知道，呢啲情況咁多年嚟一定有，當對方見到太太出現，慢慢就會走開。」

今年係關禮杰同太太結婚30周年，佢希望可以一家人同相識多年嘅朋友食飯慶祝。

關禮杰透露平時會做一啲細舉動氹太太開心，佢話∶「佢話送花唔環保，我就會突然送佢一支花，佢會好開心。我要多謝佢多年嚟對我嘅信任同支持。」

提到大女楓馨同細女楓盈，關禮杰話佢哋對娛樂圈工作興趣唔大，而佢自己內心嗰團火亦冇以前旺盛，只係仲鐘意演出唔同嘅角色，好似《機場特警》中嘅Man Sir。