「TVB小生」冇工開，被逼到地盤做兼職

「TVB小生」莫家淦憑《愛回家之開心速遞》成功入屋，雖然佢有做眼鏡同手錶生意，但受到疫情影響大受打擊，加埋出埠登臺亦因為疫情需要隔離而擱置。

但為咗養屋企兩隻「化骨龍」，莫家淦狂接網上小型廣告之外，仲畀記者拍到同老友、憑《殺手》人氣上升嘅陳國峰齊齊做運輸工人「秘撈」搵外快。

據悉莫家淦、陳國峰現身貨物櫃場開工，佢哋著上寫有能源公司名嘅制服、戴上頭盔同口罩，喺工友指導之下，將太陽能板搬上貨櫃車，相當勤力。

出名大力嘅陳國峰亦顯辛苦，莫家淦更搬到身水身汗水。之后佢哋同一班工友席地而坐放飯，快快“扒完”飯盒之后，又急急腳繼續開工。

對于畀爆做搬貨養家，記者致電莫家淦，佢話「其實係有朋友要搵人搬啲太陽能板，900蚊做9粒鐘，佢未搵到人，我哋又有時間咪幫嚇手。」

莫家淦坦言宜家工作量大減，為咗生計無辦法都唔介意去做，而且宜家鋪頭生意蝕住做，好彩仲算「頂得住」。