「TVB小生」不愛江山愛美人，20億家業拱手相讓

家族坐擁超過20億資產，一直畀喻為筍盤嘅「TVB小生」林峯（原名林逸峯），呢排正式對外宣佈封盤，準備同29歲內地模特兒張馨月結婚。

準備40歲嘅林峯告別7年之愛吳千語之後，一直心急結婚，離開TVB喺內地發展，星運資源算唔上好，都唔算差。

林峯入行前已經喺圈中有名氣，皆因老竇係福建廈門最大嘅地產發展商之一，喺內地擁有多個屋苑同商場，仲喺杭州投資約四億港元作技術研究同實驗，旗下公司嘅資產總值逾二十億港元。

不過林峯不愛江山，寧愿喺娛樂圈發展都唔想做生意，於是有人話佢唔努力做明星就要返屋企繼承家業。

因此林峯老竇嘅生意唯有畀28歲胞弟林逸銘，據悉林逸銘喺美國南加州大學畢業之後，就喺老竇林華國嘅身邊學做生意。

有指，胞弟林逸銘甚得老竇重用，交際手腕極強，三年前更成立多間公司，尤其夜店生意，特別搞得有聲有色。

此外，由于林逸銘人緣極好，唔單止同賭王仔女熟，仲同韓國明星勝利有非一般關係。