新冠肺炎疫情肆虐，「星夢一姐」菊梓喬（Hana）表示唔少工作畀叫停，佢話：「我哋嘅工作係公開表演，依家疫情關係真係冇辦法，大家留喺屋企避免到多人嘅地方，對我嚟講係幾致命嘅！」
好多歌手藝人因為疫情打擊變零收入，菊梓喬亦坦承：「我都係零收入，因為工作取消曬、延后曬，冇辦法，咪慳啲使！」
菊梓喬自爆冇錢交5位數嘅稅款，貴為「星夢一姐」佢嘅坦言：「仍未算係搵到錢，收入一直唔穩定，因為冇留到錢交稅嗰下大鑊，你唔明㗎喇，你跟嚇我生活就知我幾窮。」
呢幾年身價不斷飆升，有指菊梓乔應該搵到錢，佢就苦笑話：「有幾多呀？每個月要供車租樓，工作好多時化妝、SET頭、租車，樣樣嘢都係錢，我依家好慘，樓又冇，仲要租屋，仲好貴。（疫情下業主有冇減租？）一千蚊都唔減，可能之后又要搬，搵過平啲嘅地方。」
禍不單行嘅菊梓喬，佢原本4月11日準備到美國洛杉磯開騷，今次演出令佢緊張、興奮又期待，因為第一次出國做騷，佢更曾經笑言：「可以搣歌酬住先。」點知道美國亦因為疫情影響，佢嘅演唱會宣佈押后，認真黑仔！
Like MisshkNews Facebook！不出门也能知天下事～
