前港姐蔡嘉欣「人紅是非多」， 引爆網上罵戰！

現年27歲嘅蔡嘉欣（Kayan）喺2019年嗰陣參選《香港小姐競選》，雖然大爆冷門最後落選港姐，但完全唔影響佢加入TVB，而且進入TVB之後備受力捧。

蔡嘉欣一直備受大家關注，可能正因為人紅是非多多，之前佢曾經因為喺社交平臺上曬名車、名牌包包、大量現金而畀網民圍插指出「炫富」、「拜金」。

不過蔡嘉欣對外間嘅抨擊一於少理，繼續堅持做自己。呢日佢喺社交平臺同網民大玩「你問我答」，解答一眾網民嘅疑問，點知就同其中一名網民引爆網上罵戰！

事關呢位網友直指蔡嘉欣「短髮勁似阿嬸」，所以蔡嘉欣即刻反擊對方：「其實你咁憎我點解又要睇我啲嘢呢？有得揀唔睇，點解都要睇呢？我啲嘢好好睇咩？」

正因為蔡嘉欣呢個留言，仲惹咗其他網友嘅反駁，「人哋覺得你似阿嬸唔得乜，唔通係一定要讚你個新髮型靚先得呀？」

對此蔡嘉欣都有回應呢位網友，佢表示之所以會回覆呢個人，并唔係因為自己唔接受他人嘅批評，或者唔支持嘅聲音，但對方嘅出發點係帶有惡意嘅。

蔡嘉欣話：因為呢位網友不停用假帳號攻擊我，當中就話我「賣埋晒啲毒藥喺度害人」、「EQ勁低，唔怪得之落選港姐」、「唔鍾意你就梗㗎啦，成日扮晒正面喺度教人做生意，眼中剩係得錢好嘔心」、「話你短頭髮唔好睇，又會即刻有人讚你個頭靚，假到呢，自尊心強唔接受負評」等。

最後蔡嘉欣作出總結：「呢個世界真係咩人都有」。