「TVB女神收割機」再出動，偷偷拖手秘戀4個月

「TVB女神收割機」羅天宇無論係舊愛茍蕓慧、湯洛雯，抑或係緋聞女友陳瀅、戴祖儀，個個都係女神級別，可見佢冧女有一手，魅力驚人。

日前就有報道傳出羅天宇又有新戀情，而對象就係同佢合作主演TVB新劇《十月初五的月光》嘅女主角何依婷。

現年27歲嘅何依婷係2017年港姐亞軍，有靚樣身材正，同樣都係女神級別。據悉羅天宇同佢已經秘戀4個月，仲畀爆出佢哋喺煞科宴上情不自禁偷偷拖手，又拍拖去夾公仔，相當甜蜜。

 據悉，何依婷嘅媽咪唔讚阿女呢段戀情，因為佢覺得羅天宇形象花心，而啊女形象乖乖女仲加埋開始備受力捧，前途可謂一片光明，所以唔希望啊女因為拍拖而影響到演藝事業。

事後，何依婷回應戀情嗰陣竟然直嗌冤枉否認，仲話同羅天宇唔係好熟，只係拍劇朋友，大家都係工作上好努力嘅人，講到話羅天宇為佢夾公仔，佢解釋係劇集情節，工作後私低冇見過面，完全冇聯絡喎！