按照慣例，港姐冠軍一般都會有一年時間要代表香港出戰世界性選美比賽，出席其他宣傳香港嘅活動，之後先有機會拍劇做活動等。雖然大部分嘅港姐冠軍做咗一年後都會選擇繼續同TVB簽約，但亦有人會選擇唔續約，甚至離開娛樂圈，而且更有人喺一年間就被TVB罷免解約。
2017年港姐冠軍 雷莊?（兒）
喺前幾日，2017年港姐冠軍雷莊?（兒）出席「2018香港小姐競選」記者會時，公開宣佈話自己卸任後，決心離開香港，然後返回加拿大生活及尋求工作機會。
之前佢接受訪問時就表示：「香港嘅節奏唔係咁適合自己，其實本身都諗住返嗰邊發展，選嗰晚都講咗一句想去荷里活發展，喺香港玩咗一年，時間過得好快，會好唔捨得化妝、梳頭同工作人員，好鍾意同佢哋傾偈。」
據悉，雷莊?同TVB嘅合約去到12月先正式完約，但就會喺今屆港姐（9月）完結後，離開香港追尋自己嘅演員夢，相信到時TVB唔會留難佢。
2008年港姐冠軍 張舒雅
講到2008年港姐冠軍張舒雅，係史上有名嘅「最Hea港姐」，仲係難得一見被罷免嘅港姐。當年佢以黑馬大熱當選，仲要以180cm嘅身高成為歷屆最高嘅港姐，而令人對佢留下印象。但佢當選後就向TVB申請因病而不出席任何活動，之後更稱因為累，而退選世界小姐及國際中華小姐競選，咩都無做咁滯。
但紙包唔住火，佢其後被傳媒影到常常出入娛樂場所，結果令TVB震怒，仲決定罷免佢嘅工作，將佢雪藏，亦令下一屆嘅港姐冠軍冇咗上屆嘅加冕，認真經典。
2002年港姐冠軍 林敏俐
林敏俐係2002年嘅港姐冠軍，並代表香港出戰2003年度國際華裔小姐競選，奪得亞軍。但其後佢選擇急流勇退，據知佢離開娛樂圈嘅原因係因為參選港姐前已經喺美國完成3年嘅大學課程，所以要回美繼續學業。
不過，亦有傳林敏俐因要接手亡父嘅生意，佢父親生前曾係香港著名成人雜誌《龍虎豹》出版業者林國光，為照顧居美嘅媽媽和兩個妹妹，所以先會回美國。至於邊個原因先係真，相信佢自己先知。
2000年港姐冠軍 劉慧蘊
劉慧蘊係2000年嘅香港小姐冠軍，當年佢更係四料得主，包括：香港小姐冠軍、最上鏡小姐、國際親善小姐和最具新世紀風采小姐。但一年後，TVB並冇同佢續約，而當年同屆嘅亞軍和季軍一樣冇續約，罕有咁同一年三個港姐都唔續約。
1997年港姐冠軍 翁嘉穗
1997年嘅港姐冠軍翁嘉穗係個四料冠軍，包括：香港小姐冠軍、最上鏡小姐、東方美態大獎和都會魅力小姐。
而佢唔續約嘅原因非常簡單，就係因為佢其後嫁咗俾佢大20年嘅七海化工集團有限公司主席鄔友正，之後做個幸福少奶奶，生活無憂。
1986年港姐冠軍 李美珊
1986年香港小姐冠軍李美珊，係紐約大學生物系碩士畢業生，係當時第一位碩士生港姐冠軍，但當選後冇同TVB簽約，因為佢要回美繼續讀完正在修讀嘅課程。而家長居國外嘅李美珊，有時都會回港出席活動，而且亦係慧妍雅集嘅會員。
Like MisshkNews Facebook！不出门也能知天下事～
