「TVB視帝」北上拍劇要隔離，隔空傳情好甜蜜

「TVB視帝」馬國明同湯洛雯自從認愛以來，佢哋表現得相當甜蜜恩愛，仲經常會喺社交平臺大放閃光彈，而且佢哋更已經到達同居試婚階段，男方幾乎長駐女友喺紅磡嘅香閨。

日前，馬國明已經返大陸深圳拍攝TVB新劇《白色強人II》，雖然佢同湯洛雯分隔兩地，但尋日佢喺社交平臺曬出定情信物（馬仔），仲留言話：「隔離第1日……」

而湯洛雯就曬出另一定情信物（獨角獸）嚟回應男友馬國明，仲留一個唔開心嘅表情，而且獨角獸公仔睇頭耷耷好似好失落。馬國明即時留言：「慘慘豬」嚟安慰佢。

湯洛雯嘅圈中好友高海寧就住笑言話：「哎呀～隔空傳情！」

唔理點樣，宜家見到湯洛雯同馬國明咁幸福，真係替佢哋開心，祝福佢哋可以早日再傳出好消息，拉埋天窗。