「TVB視后」繼續分居，男友默認箍煲失敗

日前，「TVB視后」李佳芯同男友陳炳銓傳出已經秘密分手，皆因女方較早時畀發現突然搬出愛巢入住「疫區」紅磡服務式住宅，剩返陳炳銓一個人喺獨立屋過活。

李佳芯曾經對外解釋因為工作原因而搬屋，不過呢排劇集已經拍攝完畢，但未見佢哋「復合」，再度惹來分手傳言。

對於感情情況，記者聯絡上陳炳銓，佢話：「多謝關心」言語間似乎默認分手、箍煲失敗，而李佳芯就未有任何回應。

其實李佳芯、陳炳銓呢段感情一直唔畀睇好，畀外界形容為「美女與野獸」之戀，可謂圈中數一數二嘅女尊男卑組合！

但李佳芯未有理外界閑言閑語，佢決定同男友共同進退，反而愈住愈豪，搬入千萬獨立屋同居。前年李佳芯因為政見問題，事業出現前所未有嘅考驗，宜家估唔到連愛情亦起咗變化！

講到李佳芯，其實佢入行以嚟，以狐貍精、邪花角色上位，從2012年有線過檔到TVB發展，同黃翠如係同期進入TVB，佢基本係由茄喱啡到女配角，最後順利上位做女主角。

不過，李佳芯成功走紅就心高氣傲，佢曾經一度為咗喺圣誕同新年檔期揾快錢，反口推劇激嫐TVB高層，當時TVB要出動愛將黃翠如臨危受命，頂佢拍《那些我愛過的人》。

雖然李佳芯獲TVB高層網開一面，繼續有機會拍攝重頭劇《殺手》同《愛美麗狂想曲》，但由於言論問題畀TVB雪藏，觀眾緣同人氣急挫，近幾個月幾乎絕跡熒光幕。

而且李佳芯《踩過界II》、《BB大晒》同《白色強人II》換角之外，下月開拍嘅《七公主》，原本由佢担正做女角色，亦改由黃翠如頂上，連續四劇畀飛走。

冇工開嘅日子，李佳芯一個人揸車出街，出街食飯都係茶餐廳或者街邊小食，絲毫冇星味，冇收入來源梗係要開源節流。

唔理點樣，希望佢地兩個可以傳出好消息，祝福祝福。