前亞姐正式簽約邵氏，宣佈「返娘家」拍劇

前亞姐伍詠薇（伍姑娘）自從2013年離開效力19年嘅TVB之後，一直都係多方面發展，佢曾經喺ViuTV做過主持人，正在熱播嘅ViuTV劇集《嘆息橋》亦有份演出。

而今日伍詠薇喺社交平臺高調宣佈簽約邵氏，佢仲留言話：「今日好日子，我終于返娘家啦，多謝樂小姐，仲有我靚女偶像～～珍姐＃邵氏大家庭！」

51歲嘅伍詠薇離開TVB都有一段時間，雖然伍姑娘係亞姐、亞視出身，不過佢亦喺TVB拍咗唔少好劇，當中包括《高朋滿座》、《金枝欲孽》、《美麗高解像》等。

其實伍詠薇喺2018年都有份參與拍攝邵氏劇集《飛虎之潛行極戰》，佢飾演黃宗澤阿媽，佢哋有段特別嘅“母子情”，角色相當出位，觀眾對佢嘅演技只贊冇彈。

伍詠薇接受傳媒訪問時話：「其實之前拍攝《飛虎之潛行極戰》第一輯嗰陣都係樂小姐揾我，我都拍得好開心，角色我好鍾意，之後我哋都傾咗好耐，多咗瞭解，係時間嘅問題，呢個疫情時間，自己都好感恩有做嘢，我真係好中意做戲。」

伍詠薇入行咁多年，演出經驗豐富，佢喺亞視、TVB、ViuTV、有線都做過。對于呢次簽約做邵氏藝人，佢直言係「返娘家，真係好開心。」，而且唔少觀眾留言好期待伍姑娘演出。