前港姐愛情路坎坷，倒貼男友只為真愛

不嬲港姐從嚟唔洗愁冇出路，唔係嫁豪門就係嫁青年才俊，不過呢排呢位港姐冠軍有啲急進，馮盈盈明明先25歲，舊年佢同醫生男友鍾文浩分手，空窗半年嘅佢呢排已經快手將自己送出。

現年25歲嘅馮盈盈，曾經同醫生男友相戀多年，算係愛情長跑，參選港姐之後都冇否認過自己戀情，仲成日曬恩愛宣誓主權。

出名夠膽愛夠膽恨、愛情至上嘅馮盈盈，當年為舊愛醫生Martin一早全程奉獻，為愛犧牲事業，唔怕妨礙演藝前途。

舊年馮盈盈更倒貼首期幫男朋友置業，即使物業唔加自己個名亦唔計，又全程做工人打理家庭，家務煮飯一個人全職負責。

可惜，即使幾好嘅女朋友，男人總有一日會厭倦，佢哋啱啱置業同居冇幾耐就傳出分手消息，據悉馮盈盈唔係嚟自豪門家庭，即使倒貼男朋友都得唔到挽留。

而空窗半年嘅馮盈盈不甘寂寞，火速同鄭衍峰（Leonard）發展地下情一切重新出發，出名愛情至上嘅馮盈盈更加唔計較鄭衍峰冇事業、冇家底，又再次倒貼60萬買新車畀男友開。

愛得死心塌地嘅馮盈盈，為咗鄭衍峰事業發展，佢更加係舉薦男友畀監制，希望有多啲出鏡機會，不過呢次馮盈盈可能又要錯付真心。

因為鄭衍峰有女神收割機稱號，佢曾經借拍《3日2夜》追求鄺潔楹，對其大獻殷勤，不過富二代出身嘅鄺潔楹唔鐘意呢位一窮二白嘅男藝人。

馮盈盈同新男友係喺《#後生仔傾吓偈》相識，雖然未肯公開認愛，但馮盈盈就享受人前人后曬恩愛，唔避嫌同鄭衍峰經常合體出節目，再次貫徹其愛的奉獻精神。

鄭衍峰算係對馮盈盈趁虛而入，因為拍攝《#後生仔傾吓偈》加拿大特輯，鄭衍峰已經知道馮盈盈失戀，經常借機約馮盈盈去玩，對馮盈盈照顧周到。

本來寂寂無名嘅鄭衍峰，因為女友馮盈盈而廣為人識，更一度畀誤傳係富二代，但其實長居溫哥華嘅父母係打工仔，鄭爸爸係航空公司工程部維修工，而鄭媽媽就係電器店售貨員。