前「香港先生」暗示升呢做老竇，與相愛14年絕世好老婆共渡患難

繼歌手古巨基升呢做老竇之后，前「香港先生」黎振燁呢排接受TVB節目《娛樂頭條》訪問嗰陣，就暗示咗遲啲有好消息公佈，疑似佢就快升呢做老竇！

呢排，黎振燁提到有份演出嘅新劇《食腦喪B》中準備會同朱智賢，有段可歌可泣嘅感情古仔，劇中佢原本有個小朋友，之后同朱智賢組織家庭會生一個小朋友，於是拍劇時唔少得成日同小朋友對戲。

而現實中嘅黎振燁都好鐘意同小朋友相處，被問到同太太嘅造人大計實行到乜地步時，佢就好神秘噉話：「作為老公，我都一直想有BB，至於幾時有呢，我就唔方便同大家講啦。我一直都好努力，話唔定聽日就有。」

記者問到：「係咪太太懷孕未夠三個月所以唔講呢？」黎振燁就大賣關子話：「呢方面我又唔可以答你，等下啦，總有機會嘅。」

黎振燁同圈外太太結婚5年，佢一直努力實行造人大計，話得好清楚好想要BB，兩夫妻做足婚前同產前身體檢查，醫生話應該好易中，自結婚之后兩個人積極造人，但肚皮一直未出好消息，更向好友梁烈唯請教過生B秘笈。

黎振燁同老婆喺中學時代開始拍拖，太太係幼稚園老師一直支持佢追夢，而黎振燁本身係時裝設計師，2009年突然放棄高薪厚職加入TVB藝員訓練班，做咗3年茄喱啡就離開公司，一度以模特兒為正職，想放棄多年演員夢。

2015年係黎振燁人生轉捩點，太太愿意喺佢最失意嗰陣下嫁，求婚、擺酒、度蜜月、拍結婚照統統都冇，只係簽紙同屋企人簡單食飯。

太太更為佢事業尋找機會，主動幫黎振燁填表報名參加香港先生，最終佢以大熱姿態奪冠，畀媒體譽為係「翻版古天樂」，之后佢機會接踵而來，呢幾年終于捱出頭，劇集一套接一套。