田啟文傾到「醬爆」零NG，竟然唔關演技事！

田啟文（田雞）日前接受訪問，傾到同星爺周星馳合作，期間講到2000年拍攝《少林足球》嗰陣，仲親證坊間一個傳聞，話「醬爆」何文輝喺饅頭店前嘅爆發Moment，真係一take過冇NG搞掂！（文章最后有片）

2001年上畫嘅《少林足球》，係周星馳正式沖出國際嘅代表作，更為佢帶嚟香港電影金像獎影帝同最佳電影等榮譽。

傾到創作嘅時候，當年跟足全程嘅田雞，回憶返周星馳對拍攝嘅嚴謹已經去到吹毛求疵，閑閑地一個鏡頭都要Take廿次，其中四師弟陳國坤就係第一個賴嘢。

田雞話∶「單係拍陳國坤出門口一幕，足足拍咗34 Takes，好痛苦，拍到陳國坤都想放棄自己。周生要求好高，所以大家都認同喺佢執導之下，冇可能有人做到一Take OK，但結果醬爆做到。」

喺《少林足球》入面，醬爆要喺饅頭店門前講一段發人深省，激發起星爺同豬肉佬等人內心一團火。

田雞話∶「最初開拍，大家都喺到估要NG幾多次？我估起碼雙位數。然后當拍完第一Take，李力持正準備再嚟多Take時，周生突然間一句∶『OK㗎喇！』」呢個回應，的確震驚全場。

結果周生終于講出一Take收貨嘅理由∶「佢做嘅嘢我根本做唔到，佢係做番自己，好自然，你哋邊個做到吖？你改佢就搵自己笨！頭先機有冇事吖？冇吖嘛，咁OK啦！」

田雞諗返同周生共事十幾年，從來未見過有人可以一Take過，連佢本人都係經常忍唔到笑而NG，可算係創下紀錄。

最後大家一起重溫經典「醬爆」片段。