「TVB小生」李天翔舊年底憑借臺慶劇《解決師》人氣急升，喺劇中擔正飾演大反派「太子」一角嘅佢，演技大受好評，更獲網友力撐成功首次入圍TVB「萬千星輝頒獎禮」，有份角逐「最佳男配角」殊榮。
李天翔雖然獲得提名「最佳男配角」，但佢竟然冇份去頒獎禮，而且「最佳男配角」最後畀入行4年嘅新晉小生周嘉洛獲得。
唔少觀眾都為李天翔覺得唔抵，但亦有網友認為，由于李天翔舊年已經宣佈離巢，與TVB結束22年賓主情，按照TVB不嬲嘅處事方式，一般唔會頒獎畀離巢藝人，所以失落「最佳男配角」獎項，都係意料之內。
入行已經22年嘅李天翔，喺TVB由兒童節目主持開始做起，當年佢主持嘅《閃電傳真機》、《至NET小人類》深入民心，佢喺節目中飾演「認字特警」、「問號超人」，真係陪伴咗一代人嘅成長。
喺2000年開始，李天翔開始頻繁畀TVB安排飾演反派角色，久而久之更畀定型，令佢從一個送畀兒童歡樂嘅主持人，變成奸詐形象深入民心嘅配角演員。
對此，李天翔直言：「我好似一隻牛，公司叫我做乜我就做乜，直至2008年好多劇都有我，周圍嘅人都話嗰年『男配』或者『飛躍』我都有機會，但最終我就連提名都冇份，當時真係好失望，之後冇對攞獎有期望。」
2017年，李天翔宣佈與拍拖6年嘅圈外女友BoBo結婚，由于做演員收入唔高，但太太BoBo家底豐厚，令李天翔無後顧之憂，所以喺5月份李天翔決定「裸辭」，李天翔更直言：「確實係太太叫我離開TVB！」
講到靠富貴太太支持先大膽離開TVB，李天翔就坦言：「太太確實係可以畀我無後顧之憂，因為佢可以照顧自己，讓我可以夠膽多行一步。佢思路清淅又理性，反而自己唔識分析，所以我係非常相信太太嘅決定。」
唔理點樣，都係希望李天翔喺之後嘅事業上可以有所成就，期待佢嘅表演！
Like MisshkNews Facebook！不出门也能知天下事～
