前港姐唔做「TVB親生女」，其實TVB早已安排接班人……

備受力捧嘅「十優港姐」麥明詩（Louisa）較早時接受採訪，承認為咗自由身，放棄做「TVB親生女」，改簽一年一騷嘅綠葉約，此舉除咗讓網民形容為「跳船」之外，更代表TVB力捧多年嘅努力付之流水。

老實講，呢幾年同麥明詩定位相似，即有學歷、有外貌、講得、玩得、夠淡定、做得主持兼有觀眾緣嘅，真係買少見少。

不過，正所謂「一雞死一雞鳴」，其實早喺上年52週年臺慶，麥明詩嘅接班人就已經出現喺佢身後。冇錯，佢就係2017年香港小姐亞軍嘅何依婷（Regina），雖然佢會考成績唔夠麥明詩亮眼，但就讀城市大學時都有GPA 3.5優異水平。

何依婷2016年更以一級榮譽學士學位畢業，之後喺會計師事務所擔任金融服務顧問。再者，喺2018年正式加入TVB後，憑住親切嘅形象以及甜美嘅笑容，收獲大批粉絲。

何依婷嘅事業路與麥明詩相差無幾，當選港姐後一年就成為咗《Think Big天地》等節目主持，直到2019年1月份，更加強勢加盟《學是學非》成為「是非精」。

當時更有網民表示，因為何依婷先睇《Think Big天地》以及《學是學非》。

相信喺2020年麥明詩「離巢」之後，何依婷就會成為佢嘅接班人。