「TVB御用惡岳母」從住豪宅淪落住村屋，為養仔女日用20蚊

擁有又尖又響亮聲線嘅李楓，擅演牙尖嘴利嘅岳母角色，現實中嘅李楓大半生嘅命途坎坷。李楓係1977年第6期TVB藝人培訓班出身，同期同學有呂良偉、陳玉蓮等人。

李楓老竇因為爛賭導致屋企破產，李父最後因為抑鬱症吊頸自殺，李楓既為養家又追演藝夢，當年讀藝訓班嗰陣，唯有半工半讀。

老竇離世，迎來另一個悲劇，李楓嫁畀從事制衣生意嘅老公，原本可以做少奶奶，可惜老公生意失敗，為咗幫老公還債李楓將嫁妝、珠寶通通賣咗。

1995年李楓先翻TVB拍劇，為咗養活仔女，佢每日就洗20蚊，生活艱難令佢透唔到氣嚟，之後老公又沉迷炒股輸咗唔少錢，從九肚山豪宅淪落至住村屋，屋企仲曾經經歷兩次破產。

李楓憑借演出牙尖嘴利惡岳母角色而備受關注，經歷婚姻失敗嘅李楓，喺2006年受病魔來襲，當時醫生喺其腦部發現水泡，呢個水泡導致李楓腦出血同影響腦神經。

負擔唔起私院醫藥費嘅李楓，最終排期捱到去公立醫院做開腦手術，結果做咗7個鐘嘅手術，雖然逃出鬼門關，不過佢留低唔少後遺症，其中一個就係健忘。

老嚟獨居嘅李楓同仔女關係疏離，早年孫仔舉行百日宴佢都冇份出席，連個孫仔都冇抱過。