陳山聰同李施嬅主演嘅TVB懸疑劇《金宵大廈》播出之後大受好评，形形色色嘅奇幻劇情相當緊湊，成功吸引觀眾嘅眼球，重掀追劇潮。
繼內地劫匪彭彭（方紹聰飾演）發狂殺死出租女友小魚（黃文意飾演）後，最新一集就由趙希洛主演嘅《嬰》登場！
趙希洛係參選香港小姐入行十二年，出色演技都贏得唔少掌聲。多次飾演變態殺人犯嘅佢，更畀封為「TVB御用癲婆」。
趙希洛接受訪問嘅時候，佢就話何太係佢史上最恐怖嘅角色：「呢個角色我自己都驚，因為好多眼神都有表現得好凌厲。
而且場景同道具都好恐怖，好多血淋淋嘅場面，好似我要斬啲豬腦同豬大腸，好核突，一邊拍其實我一邊喺度嗌，但都好玩嘅！」
被問到再次飾演癲婆角色，驚唔驚畀定形，趙希洛就笑言：「我自己就唔介意，因為呢類角色，通常都畀到觀眾深刻印象，同埋本身發揮空間都好大。
今次我都有參考外國演員去做，研究點樣做少啲嘢，又令人唔舒服，梗係我做到冇人哋咁叻喇。
（怕唔怕出街畀人話好恐怖？）我驚冇客（廣告商）搵我咋，記住我真係做好角色嘅本份，我真人唔係咁，今次連李施嬅都話我做得好恐怖，都唔知好事定壞事。」
問到會唔會步好姊妹李施嬅后塵轉戰外國發展，趙希洛就話：「有冇好介紹？其實我講廣東話對白的確唔叻，冇咁自然，所以我都好想用英文去做戲，睇機會，我都希望可以兩邊發展。」
Like MisshkNews Facebook！不出门也能知天下事～
