20年努力由少女到樂壇天後，容祖兒成名史好辛酸

樂壇天後容祖兒（Joey），呢排舉行佢嘅第13個紅館演唱會《容祖兒PrettyCrazy演唱會2019》，一連唱足十八場與粉絲慶祝出道二十周年。

喺1995年，容祖兒仲係一個寂寂無名嘅僆妹，佢參加咗Big Echo卡拉OK大賽并以關淑怡嘅《一首獨唱的歌》，贏得比賽金獎同正東唱片歌手合約。

第二年容祖兒就推出第一首單曲《第一次我想醉》，從此開始咗佢嘅歌手生涯。

其實，而家看似已上神壇成為香港樂壇天後嘅容祖兒，喺起頭嗰陣都有經歷過好多挫折同惡意批評，推出第一首單曲之後畀公司以個樣唔夠靚女為由解約。

之後佢轉投嘉音唱片錄咗日劇《同一屋檐下2》主題曲《溫暖的詩句》之後，再次因為公司清盤而畀解約。

天後之路唔易行，喺最艱難嗰陣遇上咗佢——羅文。

羅文將容祖兒邀請進入飛圖唱片，容祖兒喺一次與羅文同俄羅斯交響樂團嘅合作演唱會中一鳴驚人，讓大部人認識到有一位歌手叫容祖兒。

後尾羅文更向容祖兒提出想正式收佢為徒，而容祖兒都講過永遠感激對方。

喺1999年9月29日，容祖兒推出咗首張專輯《EP Joey》，銷量達13萬張，更加創下到而家仍未有新人可以打破嘅紀錄——唱片銷量榜長達23星期。

喺2001年上半年嘅時候，容祖兒聲帶發炎，佢曾經一度以為要為自己嘅歌唱事業畫上句號，所以拍攝咗《百分百感覺2》、《我的野蠻同學》同《蘋果咬一口》三套電影。

2011年，容祖兒成功繼羅文、陳奕迅之後，喺英國倫敦皇室阿爾伯特音樂廳舉辦首次歐洲演唱會，都係首位華人女歌手喺呢個場地進行演出，係出道多年嘅其中一個里程碑。