前港姐畀曝明年秘婚，貼千萬豪宅下嫁音樂才子

現年32歲嘅前港姐高海寧，自從2016年畀傳出與音樂才子鄧智偉秘密相戀之後，二人更已發展到同居關係，到而家兩個人蜜運三年，感情一直都好穩定，真係羨慕旁人。

呢排，有知情人爆料：兩個人正在計劃完成人生大事，籌備明年初飛去歐洲秘婚。

較早前，高海寧結伴好朋友李佳芯，到西班牙巴塞隆拿旅行，疑似順便到當地視察結婚場地。

日前，高海寧更出動到超市血拼，選購逾千蚊嘅食材返屋企煮飯畀男朋友食，好似預演佢嘅師奶生活。

收到風，高海寧甚至拎出自己名下近千萬嘅物業，諗住用作新婚愛巢，睇來佢為嫁愛郎，真心全奉獻。

入行11年嘅高海寧，喺呢排播出嘅無線新劇《婚姻合伙人》中，首次擔正做女主角。

雖然事業啱啱起步，但與音樂才子鄧智偉拍拖超過三年嘅高海寧，并未因此而延緩結婚大計。

據密友爆料指，兩個人呢排私下對親朋好友透露，而家籌備明年初嘅結婚計劃，原因想趁後生生小朋友。

密友形容，兩個人平時相敬如賓，好似老夫老妻，不過大事主要由男友做主，而高海寧亦樂做背后嘅小女人。

所以婚事嘅安排，都會按照男方嘅意思，諗住低調處理，所以喺香港唔打算擺酒，要去外國舉行婚禮，結完婚再公布。